തഞ്ചാവൂരില്‍ ബൈക്കുകള്‍ കൂട്ടിയിടിച്ച്‌ അപകടം. കോട്ടയം സ്വദേശിയായ ബാങ്കുദ്യോഗസ്ഥന് ദാരുണാന്ത്യം...
തമിഴ്നാട് തഞ്ചാവൂരില്‍ ബൈക്കുകള്‍ കൂട്ടിയിടിച്ച്‌ കോട്ടയം തലയോലപ്പറമ്ബ് ഇടവട്ടം സ്വദേശി മരിച്ചു. ഇടവട്ടം രാഗരശ്മിയില്‍ പരേതനായ മുരളീധരൻപിള്ളയുടെ മകൻ ഇന്ത്യൻ ഓവർസീസ് ബാങ്ക് തഞ്ചാവൂർ നാഗപട്ടണം റീജണല്‍ ഓഫീസിലെ ജീവനക്കാരൻ എം. രാഹുല്‍ (36) ആണ് മരിച്ചത്.
തിങ്കളാഴ്ച ജോലിക്കുശേഷം സ്പോർട്സ് മീറ്റില്‍ പങ്കെടുത്ത് താമസസ്ഥലത്തേക്കു മടങ്ങുന്നതിനിടെ രാത്രി ഒൻപതിനായിരുന്നു അപകടം. റോഡില്‍ തലയടിച്ചുവീണ രാഹുലിനെ തമിഴ്നാട് പോലീസെത്തി തിരുവാരൂർ ഗവ. ആശുപത്രിയില്‍ പ്രവേശിപ്പിച്ചെങ്കിലും രക്ഷിക്കാനായില്ല.
രാഹുലിന്റെ ലൈസൻസില്‍നിന്ന് വിലാസം കണ്ടെത്തി ചൊവ്വാഴ്ച രാവിലെ എട്ടുമണിയോടെയാണ് വിവരം വീട്ടുകാരെ അറിയിച്ചത്. നടപടികള്‍ പൂർത്തീകരിച്ച്‌ മൃതദേഹം ബുധനാഴ്ച രാവിലെ വീട്ടിലെത്തിക്കും. വൈകീട്ട് മൂന്നിന് വീട്ടുവളപ്പില്‍ സംസ്കരിക്കും.
ചൊവ്വാഴ്ച ഇടവട്ടത്തെ വീട്ടിലേക്ക് വരാനിരിക്കേയായിരുന്നു അപകടം. അമ്മ: കൃഷ്ണകുമാരി. ഭാര്യ: പൂർണിമാ മോഹൻ (ആലപ്പുഴ ചെക്കിടിക്കാവ് എടത്വാ കാർത്തിക കുടുംബാംഗം) മകൻ: ഇഷാൻ കൃഷ്ണ (വെള്ളൂർ ഭവൻസ് സ്കൂളിലെ ഒന്നാംക്ലാസ് വിദ്യാർഥി).
