ലോറിയുടെ വരവുകണ്ട് കാര്‍ നിര്‍ത്തിയോടി, വന്നുമറിഞ്ഞത് കാറിനുമേലെ. ചുരം അപകടത്തില്‍ അദ്ഭുതരക്ഷ, വലഞ്ഞ് ജനം...
താമരശ്ശേരി ചുരത്തില്‍ എട്ടാം വളവിനു മുകളില്‍ ബ്രേക്ക് നഷ്ടപ്പെട്ട് നിയന്ത്രണം വിട്ട ലോറി ഒട്ടേറെ വാഹനങ്ങളിലിടിച്ച്‌ കാറിനുമുകളിലേക്ക് മറിഞ്ഞു. മൂന്നുകാറുകള്‍, ബൈക്ക്, പിക്കപ്പ് വാൻ, ഓട്ടോ ടാക്സി എന്നിവയാണ് ലോറിയിടിച്ച്‌ തകർന്നത്. ഒട്ടേറെപ്പേർക്ക് പരിക്കേറ്റു. അപകടത്തെത്തുടർന്ന് ചുരത്തില്‍ മൂന്നരമണിക്കൂറോളം ഗതാഗതം തടസ്സപ്പെട്ടു. തിങ്കളാഴ്ച വൈകീട്ട് നാലുമണിയോടെയായിരുന്നു അപകടം. വയനാട് ഭാഗത്തുനിന്ന് പാർസല്‍സാധനങ്ങളുമായി വരുകയായിരുന്ന ചരക്കുലോറിയാണ് അപകടത്തില്‍പ്പെട്ടത്. ചുരമിറങ്ങാൻ വരിയില്‍ നിർത്തിയിട്ടിരുന്ന വാഹനനിരയിലേക്കാണ് ബ്രേക്ക് നഷ്ടപ്പെട്ട ലോറി ഇടിച്ചുകയറിയത്. മറ്റുവാഹനങ്ങളിലിടിച്ചശേഷം ഒരു കാറിനുമുകളിലേക്ക് ലോറി മറിഞ്ഞു.
ഈ കാർ പൂർണമായി തകർന്നു. ലോറിയുടെ വരവുകണ്ട് കാറിലുണ്ടായിരുന്നവർ ഇറങ്ങിയോടിയതിനലാണ് തലനാരിഴയ്ക്ക് ആളപായം ഒഴിവായത്. താമരശ്ശേരി, ഹൈവേ പോലീസും എഎസ്‌ഐ വി. സൂരജിന്റെ നേതൃത്വത്തില്‍ അടിവാരം ഔട്ട്പോസ്റ്റ് പോലീസും യാത്രക്കാരും ചുരം ഗ്രീൻ ബ്രിഗേഡ് പ്രവർത്തകരും ചുരംസംരക്ഷണസമിതിയംഗങ്ങളും നാട്ടുകാരും ചേർന്നാണ് രക്ഷാപ്രവർത്തനം നടത്തിയത്.
ആംബുലൻസുകളില്‍ പരിക്കേറ്റവരെ ആശുപത്രികളിലേക്ക് മാറ്റി. പരിക്കേറ്റവരില്‍ പള്ളിക്കല്‍ ബസാർ കുണ്ടില്‍ഹൗസ് അബൂബക്കർ (56), തച്ചംപൊയില്‍ താനിക്കല്‍ അഷ്റഫ് (57) എന്നിവർ കോഴിക്കോട് ഗവ. മെഡിക്കല്‍ കോളേജ് ആശുപത്രിയിലും എട്ടുപേർ വൈത്തിരി താലൂക്ക് ആശുപത്രിയിലും ഒരാള്‍ പുതുപ്പാടിയിലെ സ്വകാര്യ ആശുപത്രിയിലുമായി ചികിത്സതേടി. ആരുടെയും പരിക്ക് ഗുരുതരമല്ല. നേരത്തേ, ഏഴാംവളവില്‍ ഒരു മരലോറി യന്ത്രത്തകരാറിനെത്തുടർന്ന് കുടുങ്ങിയതും ഗതാഗതതടസ്സം രൂക്ഷമാക്കി. അപകടത്തില്‍പ്പെട്ട വാഹനങ്ങള്‍ ക്രെയ്ൻ എത്തിച്ച്‌ രാത്രി ഏഴരമണിയോടെ റോഡരികിലേക്ക് മാറ്റി. അതുവരെ ഒറ്റവരിയായിമാത്രമാണ് ഗതാഗതമുണ്ടായത്. തുടർന്ന്, വാഹനനിരയുടെ ദൈർഘ്യം കിലോമീറ്ററുകള്‍ നീണ്ടു...
