മണിമലയിൽ വീടിനു തീ പിടിച്ച് വീട്ടമ്മ മരിച്ചു...
കോട്ടയം ജില്ലയിലെ മണിമലയിൽ വീടിനു തീ പിടിച്ച് വീട്ടമ്മ മരിച്ചു. പാറവിളയിൽ സെൽവരാജിന്റെ ഭാര്യ രാജം (70) ആണ് മരിച്ചത്. വീട്ടിലുണ്ടായിരുന്ന മകൻ വിനീത്, ഭർത്താവ് സെൽവരാജ് എന്നിവരെ പരുക്കുകളോടെ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. രാത്രി 12.30നാണ് അപകടം നടന്നത്. തീപിടുത്തത്തിൽ വീടിന്റെ താഴത്തെ നില പൂർണമായും കത്തി നശിച്ചു.വീടിന്റെ മുകൾ നിലയിലുണ്ടായിരുന്ന മകന്റെ ഭാര്യയും രണ്ട് മക്കളും രക്ഷപ്പെട്ടു. ഭാര്യയെയും കുഞ്ഞുങ്ങളെയും രക്ഷപ്പെടുത്തിയശേഷം വിനീത് മുകൾനിലയിൽ നിന്നും ചാടി രക്ഷപ്പെടാൻ ശ്രമിക്കവെയാണ് പരുക്ക് പറ്റിയത്. താഴത്തെ നിലയിൽ ഉണ്ടായിരുന്ന സെൽവരാജിനെയും രാജത്തെയും നാട്ടുകാരും അഗ്നിരക്ഷാസേനയും ചേർന്നാണ് പുറത്തെത്തിച്ചത്. വിഷപ്പുക ശ്വസിച്ച് രാജത്തിന്റെ നില ഗുരുതരമായിരുന്നു.നാട്ടുകാർ ചേർന്നാണ് ആദ്യം രക്ഷാപ്രവർത്തനം നടത്തിയത്. കാഞ്ഞിരപ്പള്ളി അഗ്നിരക്ഷാ സേന എത്തിയെങ്കിലും വാഹനത്തിന് വീടിനു സമീപത്തേക്ക് എത്താൻ സാധിക്കാത്തതിനാൽ ഒരു കിലോമീറ്റർ നടന്നാണ് ഉദ്യോഗസ്ഥർ വീട്ടിൽ എത്തിയത്. മണിമല പൊലീസ് സ്ഥലത്ത് എത്തി മേൽനടപടികൾ സ്വികരിച്ചു...
