കോട്ടയം കട്ടച്ചിറക്ക് സമീപം ആംബലന്‍സ് ഡ്രൈവര്‍ കരിക്ക് കുടിക്കുന്ന സമയത്ത് കരിക്ക് കച്ചവടക്കാരന്‍ ആംബുലന്‍സ് ഓടിച്ചു. നാല് പേര്‍ക്ക് പരിക്ക്...
നിര്‍ത്തിയിട്ടിരുന്ന ആംബുലന്‍സ് ഓടിക്കാനുള്ള കരിക്ക് വില്‍പനക്കാരന്റെ ശ്രമം അപകടത്തില്‍ കലാശിച്ചു. അപകടത്തില്‍ നാല് പേര്‍ക്ക് പരിക്ക്. കിടങ്ങൂര്‍ കട്ടച്ചിറിയിൽ ഇന്നലെ (03-12-2021) വൈകിട്ട് നാല് മണിയോടെയാണ് അപകടമുണ്ടായത്. പാലാ ജനറലാശുപത്രിയുടെ ആംബുലന്‍സ് ആണ് അപകടത്തില്‍പെട്ടത്. രോഗിയെ ഇറക്കിയശേഷം തിരികെ വരുന്ന വഴി ആംബുലന്‍സ് ഡ്രൈവര്‍ കരിക്ക് കുടിക്കാനായി വാഹനം നിര്‍ത്തി. ഡ്രൈവറുടെ ശ്രദ്ധ മാറിയ സമയത്ത് കരിക്ക് വില്‍പനക്കാരന്‍ ആംബുലന്‍സില്‍ കയറുകയായിരുന്നു. താക്കോല്‍ വാഹനത്തില്‍ തന്നെയുണ്ടായിരുന്നു. വാഹനത്തില്‍ ഗിയറിട്ടതോടെ വാഹനം പിന്നോട്ട് ഓടുകയായിരുന്നു. പിന്നാലെ വന്ന രണ്ട് ഓട്ടോറിക്ഷകളിലും നിര്‍ത്തിയിട്ടിരുന്ന ബൈക്കിലും ആംബുലന്‍സ് ഇടിച്ചുകയറി. ഒരു ഓട്ടോ റോഡില്‍ തലകീഴായി മറിഞ്ഞു. ഓട്ടോയിലുണ്ടായിരുന്ന 3 യാത്രക്കാര്‍ക്കും നിര്‍ത്തിയിട്ടിരുന്ന ബൈക്കിലുണ്ടായിരുന്ന കുഞ്ഞുമോന്‍ എന്നയാള്‍ക്കും പരിക്കേറ്റു. ഇവരെ ആശുപത്രിയില്‍ പ്രവേശിപ്പിച്ചു. അപകടത്തെ തുടര്‍ന്ന് കരിക്ക് കച്ചവടക്കാരന്‍ പ്രദേശത്ത് നിന്നും മുങ്ങി. കിടങ്ങൂര്‍ പോലീസ് സ്ഥലത്തെത്തി മേല്‍നടപടികള്‍ സ്വീകരിച്ചു...
