കോട്ടയം കുമരകത്തെ ഗതാഗത കുരുക്ക് ഒഴിയുന്നു. കോട്ടയത്ത് എത്താൻ 5 കിലോമീറ്റര്‍ ലാഭം, PMGSY പദ്ധതിയില്‍ റോഡ് നിര്‍മ്മാണം...
കോട്ടയം അയ്മനം പഞ്ചായത്തില്‍ ഉള്‍പ്പെടുന്ന കല്ലുങ്കത്ര കരിമഠം ചീപ്പുങ്കല്‍ റോഡ് നിർമ്മാണം കേന്ദ്രസർക്കാരിന്റെ റോഡ് വികസന പദ്ധതിയായ പ്രധാനമന്ത്രി ഗ്രാമീണ സഡക് യോജന പദ്ധതിയില്‍ ഉള്‍പ്പെടുത്തിയതായും ഉന്നത നിലവാരത്തില്‍ നിർമ്മിക്കും എന്നും ഫ്രാൻസിസ് ജോർജ് എംപി അറിയിച്ചു. ജനവാസ കേന്ദ്രങ്ങളെ തമ്മില്‍ ബന്ധിപ്പിക്കുന്നതും കുറഞ്ഞത് 6 മീറ്റർ വീതിയെങ്കിലും ഉള്ള മണ്‍റോഡുകളെയാണ് പി എം ജി എസ് വൈ നാലാം പദ്ധതിയില്‍ ഉള്‍പ്പെടുത്തിയിരിക്കുന്നത്. ഈ പദ്ധതിയില്‍ ഉള്‍പ്പെടുത്തിയിരിക്കുന്ന റോഡ് ഉന്നത നിലവാരത്തില്‍ നിർമ്മിക്കുന്നതിനുള്ള വിശദമായ പ്രോജക്‌ട് റിപ്പോർട്ട് അധികൃതർ തയ്യാറാക്കും.
പി എം ജി എസ് വൈ പദ്ധതിയില്‍ ഈറോഡ് ഉള്‍പ്പെടുത്തി നിർമ്മിക്കണമെന്ന് ആവശ്യപ്പെട്ട് അയ്മനം മണ്ഡലം കോണ്‍ഗ്രസ് കമ്മിറ്റിയും കേരള കോണ്‍ഗ്രസ് മണ്ഡലം കമ്മിറ്റിയും ഫ്രാൻസിസ് ജോർജ് എംപിക്ക് നിവേദനം നല്‍കിയിരുന്നു. കേരള കോണ്‍ഗ്രസ് സംസ്ഥാന ജനറല്‍ സെക്രട്ടറി എ കെ ജോസഫ്, കോണ്‍ഗ്രസ് മണ്ഡലം പ്രസിഡന്റ് ഒളശ്ശ ആന്റണി, ബാബു കെ എബ്രഹാം, മനോജ് കോയിത്തറ, വി ആർ സന്തോഷ്, ലിബിൻ ആന്റണി, സുഗുണൻ പുത്തൻകുളം, ഷീബ ബൈജു, സുനില്‍കുമാർ, ജോസ് മേനോൻ കരി എന്നിവർ നിവേദക സംഘത്തില്‍ ഉണ്ടായിരുന്നു...
